Өчигдөр хэвлэл мэдээллийн байгууллагууд МАН-ын Бага хурлын сурвалжлах эрхээ эдэлж чадаагүй, ард түмэнд тэнцвэртэй мэдээлэл хүргэж чадаагүй учраас өнөөдөр МАН-аас зарласан хэвлэлийн хурлыг сурвалжлахаас татгалзлаа.
МАН өчигдөр болсон Бага хурлынхаа талаар мэдээлэл хийхээр төлөвлөөд байсан ч хэвлэл мэдээллийнхэн “Хаалттай хуралдааны мэдээллийг түгээхдээ ард түмний мэдэх эрхэд халдаж, хэт нэг талыг буюу намын даргынхаа талд ажилласан, хэвлэн нийтлэх эрх чөлөөнд халдаж, мэдээллийг түгээх сэтгүүлчдийг Тусгаар тогтнолын ордонд нэвтрүүлээгүй зэрэг” үйл явдлыг нь эсэргүүцэж, ард түмний мэдэх эрхийг хамгаалж байгаагаа илэрхийллээ. Сэтгүүлчдийн зүгээс МАН-ын хэвлэл мэдээллийн алба болон удирдлагуудад хандан мэдээллийг тэнцвэртэй хүргэх, хэт нэг талыг барьсан мэдээлэл дамжуулахгүй гэдгээ удаа дараа илэрхийлсэн боловч МАН-ынхан хүлээж аваагүй юм.
